Камітэт дзяржкантролю раскрыў схему па ўхіленні ад выплаты падаткаў у сферы грамадскага харчавання. Для гэтага ўласнікі сеткі рэстаранаў наўмысна раздрабілі свой бізнес і плацілі персаналу заробак у канвертах, праз што падатковая недалічылася 4 млн рублёў, паведамілі ў КДК.
Як высветлілася, службовыя асобы і ўласнікі сеткі рэстаранаў, у якую ўваходзілі больш за 40 установаў па ўсёй краіне, наўмысна раздрабілі свой бізнес, каб працаваць па спрошчанай сістэме падаткаабкладання. Яны зарэгістравалі не менш за 12 падкантрольных арганізацый і ІП у сферы грамадскага харчавання і дастаўкі ежы і штучна размяркоўвалі паміж імі выручку.
Акрамя таго, у гандлёвых аб’ектах хавалі ад падатковай больш за палову наяўнай выручкі, якую фігуранты потым дзялілі паміж сабой. Паводле дадзеных чарнавой бухгалтэрыі, аб’ём схаванай выручкі склаў больш за 13 млн рублёў, памер нявыплачаных падаткаў — больш за 4 млн рублёў.
Пры гэтым больш чым 210 работнікаў сеткі, то-бок практычна ўвесь персанал, уключаючы кухараў, кур’ераў, адміністратараў, атрымлівалі зарплату ў канвертах — яна складала ад 600 да 1500 рублёў у месяц.
Падчас ператрусаў канфіскавалі схаваную гатоўку, ужо падрыхтаваную да адпраўкі кур’ерам, і чарнавыя запісы па яе ўліку.
Асноўныя ўдзельнікі злачыннай схемы — сем чалавек. Яны затрыманыя, двое з іх заключаныя пад варту. Упраўленне ДФР КДК па Віцебскай вобласці распачало крымінальную справу.