Украінская тэнісістка Леся Цурэнка (95-е месца ў рэйтынгу WTA) адмовілася гуляць супраць другой ракеткі свету, беларускі Арыны Сабаленка, у 1/16 фіналу турніру ў Індыян-Уэлсе (ЗША). У каментары «Вялікаму тэнісу Украіны» спартсменка патлумачыла, што была «шакаваная» словамі прэзідэнта Жаночай тэніснай асацыяцыі (WTA) Стыва Саймана пра ўдзел расіян і беларусаў у спаборніцтвах.
— Прычынай адмовы (ад матчу супраць Сабаленкі. — Заўв. рэд.) стала панічная атака. Афіцыйна будуць напісаныя «асабістыя прычыны», але фактычна гэта праблемы з дыханнем і, можна сказаць, істэрыка. Некалькі дзён таму ў мяне была размова з нашым CEO, і я была цалкам шакаваная тым, што пачула, — расказала Цурэнка.
Паводле яе словаў, у гутарцы Сайман заявіў, што асабіста ён не падтрымлівае вайну Расіі супраць Украіны, аднак калі гульцы з Расіі і Беларусі прытрымліваюцца процілеглай пазіцыі, то гэта толькі іх уласнае меркаванне, якое «не мусіць яе хваляваць».
Функцыянер таксама выказаў упэўненасць, што расіян і беларусаў дапусцяць да ўдзелу ў спаборніцтвах на Алімпіядзе-2024, у тым ліку ў тэнісе. Ён патлумачыў гэта неабходнасцю прытрымлівацца правілаў сумленнай гульні і алімпійскіх прынцыпаў.
— Я пад уражаннем ад усяго гэтага і проста ментальна сёння сарвалася, шчыра кажучы, — прызналася ўкраінская тэнісістка.
Як паведамляе sport.ua, Леся Цурэнка ў 2023 годзе ўжо чатыры разы здымалася з матча і сем разоў — з красавіка 2022 года.
Што да Арыны Сабаленка, пасля адмовы Цурэнка ад выступу яна аўтаматычна выйшла ў 1/8 фіналу турніру ў Індыян-Уэлсе. У аўторак, 14 сакавіка, яна згуляе супраць Барбары Крэйчыкавай (16-е месца ў рэйтынгу) з Чэхіі.
Што Сабаленка (не) гаварыла пра вайну
— Гэта сапраўды жудасна, бо ніхто не падтрымлівае вайну. Ніхто! Пра гэта трэба гаварыць гучна. Але чаму мы павінныя крычаць пра гэта на кожным рогу? Гэта абсалютна не дапаможа, — выказалася Сабаленка пра падзеі ва Украіне 31 снежня 2022-га.
Паводле яе словаў, яна нічога не можа зрабіць.
— Я проста вельмі расчараваная, што спорт нейкім чынам звязаны з палітыкай. Мы проста спартоўцы, якія займаюцца сваім відам спорту. Мы не пра палітыку. Калі б усе мы маглі нешта зрабіць, мы б гэта зрабілі, але ў нас нулявы кантроль.
Сабаленка, якая перамагла на Australian Open, якая падпісала праўладны ліст спартоўцаў пасля выбараў-2020 у Беларусі і не раз была ў кампаніі Лукашэнкі, паўтарыла свае нядаўнія думкі, маўляў, яна нічога не кантралюе і нічога не можа зрабіць.
Нагадаем, пасля пачатку вайны ва Украіне беларусы і расіяне былі адхіленыя ў тэнісе ад камандных спаборніцтваў. А ў індывідуальных яны гуляюць без пазначэння нацыянальнай прыналежнасці.