Кампанія EF Education First апублікавала свежы рэйтынг краін па ўзроўні валодання англійскай мовай, заснаваны на выніках штогадовага глабальнага даследавання. Беларусь аднеслі да краінаў з «сярэднім валоданнем», паведамляецца ў справаздачы.
У даследаванні EF English Proficiency Index узяло ўдзел 2,1 млн чалавек са 111 краін (акрамя англійскамоўных), якія прайшлі тэст на веданне англійскай мовы на сайце кампаніі ў 2021 годзе. Вынікі падзялілі краіны на пяць катэгорый: вельмі высокі ўзровень валодання мовай, высокі, сярэдні, нізкі і вельмі нізкі. Сярэднесусветная адзнака за тэст склала 502 балы, усе краіны, якія атрымалі менш, аднесеныя ўжо да нізкага ўзроўню.
На першым месцы сёлета аказаліся Нідэрланды з 661 балам, следам ідуць Сінгапур (642) і Аўстрыя (628). У дзясятку трапілі ўсе скандынаўскія краіны, а таксама Бельгія, Партугалія і Германія. Сярод суседзяў Беларусі найлепшы вынік паказалі палякі — 13-е месца і роўна 600 балаў. Літва аказалася на 19-м (589 балаў), Латвія — на 25-м месцы (571 бал), Украіна — на 35-м (539 балаў).
Беларусь, у сваю чаргу, нават у гэтым рэйтынгу аказалася побач з Расіяй, але ўсё ж крыху лепш — на 39-м месцы, у той час як РФ — на 40-м. Сярод еўрапейскіх краін Беларусь знаходзіцца на 28-й пазіцыі з 35-ці, за год апусціўшыся на адзін радок. Сярэдні бал за тэст у беларусаў склаў 533. Такім чынам, Беларусь аднесеная ў катэгорыю краін, якія ведаюць англійскую на сярэднім узроўні. Разам з намі ў гэтай катэгорыі краіны ад Італіі, Іспаніі, Францыі да Грузіі, Індыі, В’етнама.
Паводле вынікаў даследавання, беларускія жанчыны лепш за беларускіх мужчын ведаюць англійскую мову: яны набралі за тэст у сярэднім 540 балаў, а мужчыны — на 14 балаў менш. Для параўнання, на 15 балаў Беларусь адстае ў рэйтынгу ад Італіі.
Яшчэ больш прыкметная розніца паміж рэгіёнамі. Лепш за ўсё валодаюць англійскай беларусы, якія жывуць у Мінскай вобласці (546 балаў). Затым ідуць Брэсцкая вобласць (534), Гродзенская (524), ва ўсходняй частцы Беларусі вынікі значна горшыя: на Гомельшчыне і Магілёўшчыне тэст здалі ў сярэднім на 508 балаў (узровень Арменіі), а вось Віцебшчына з 495 баламі зусім выпала з катэгорыі «сярэдні ўзровень валодання» ў «нізкі», на ўзровень Турцыі. Па абласных цэнтрах сітуацыя чамусьці яшчэ горшая: Мінск — 541 бал, Гродна — 529, Брэст — 522, Гомель — 500, Віцебск — 477 (узровень, ніжэйшы за Манголію).
Па ўзросце найлепшыя вынікі паказалі беларусы 21−40 гадоў, трохі горшыя — старэйшыя за сорак, а вось у 18−20-гадовых адзнакі за тэст аказаліся нават ніжэйшымі за сярэднесусветныя.
Як адзначае EF, глабальна за апошні год веданне англійскай больш за ўсё палепшылася ў групе людзей 40+, а вось моладзь 18−20 гадоў прыкметна страціла ва ўзроўні па ўсім свеце, акрамя еўрапейскіх краін.
«Пагаршэнне ведаў у моладзі звязанае з наступствамі пандэміі: дыстанцыйнае навучанне, немагчымасць падарожнічаць, сацыяльная дыстанцыя і нашэнне масак нанеслі гэтай катэгорыі найбольшы ўдар па матывацыі і імкненні да самаразвіцця», — лічаць у кампаніі.